Archivo | Xurde Álvarez RSS feed for this section

Xurde Álvarez

24 Abr

Al otru llau del silenciu
habita la súplica más dura.

Espero en ti.
Que me busques, que veas esta
enfermedá,
que me llames y qu’al pronunciar tu’l mio nome
yo nél
me reconoza.

Espero que desentierres l’orbayu
d’esta mirada, d’estos dos
pozos vacíos, d’estos dos
pozos secos.

Esta ye la única puerta
que t’abro.

Crucia’l quiciu.

Nun me dexes solu. Sabes
que crecí ente’l dolor. Sé
que tu yes esa pallabra
que corrixe la soledá. Sé
que tu m’esperes
al otru llau d’esti silenciu

onde habita escondida esta súplica

tan dura.